Útbreiðsla
Algeng um allt land en sérlega mikið í hálendismýrum og er þar oft aðalstörin í blautum flóum. Hún finnst mest á bilinu frá 300 metrum upp í 750 m hæð en einnig í stöku stað á láglendi. Hæstu fundarstaðir eru við Gæsavötn í 920 m, vestan Grjótár á Vesturöræfum í 830 m og við Þríhyrningslindir á Bárðdælaafrétti í 760 m hæð (Hörður Kristinsson - floraislands.is).
Búsvæði
Mýrar og flóar, einkum á hálendinu.
Lýsing
Fremur smávaxin stör (10–25 sm) með um tvö, nær svört, hangandi kvenöx. Blómgast í maí–júní.
Blað
Blöðin 1,5–3 mm breið, flöt, blágræn, oftast stutt (Hörður Kristinsson 1998).
Blóm
Venjulega tvö, hangandi, langleggja, fáblóma (5–8), nær svört kvenöx og eitt upprétt karlax. Axhlífarnar yddar, dökkbrúnar eða svartar með ljósari miðtaug. Hulstrið ljósgrænt, odddregið en trjónulaust, með hrjúfu yfirborði. Frænin þrjú (Hörður Kristinsson 1998).
Greining
Líkist helst flóastör en hengistörin þekkist á dekkri, styttri og blómfærri kvenöxum, hún er einnig smávaxnari og blaðstyttri.
Höfundur
Var efnið hjálplegt?
Aftur upp