Mynd: Hörður Kristinsson
Belgjastör (Carex panicea)
Útbreiðsla
Útbreidd um allt land en vex í meira magni á Suðurlandi en Norðausturlandi. Belgjastörin vex einkum á láglendi upp að 350 m. Hæsti fundarstaður hennar er í 550 m í hlíðum Járnskara í Norðfirði (Hjörleifur Guttormsson) og í 400 m við Gönguskarð í Kinnarfjöllum (Hörður Kristinsson - floraislands.is).
Búsvæði
Deiglendir móar, rök móaflög, mýrar og lækjarbakkar.
Lýsing
Meðalstór stör (15–35 sm) með eitt til þrjú legglöng en nokkuð upprétt kvenöx og einu uppréttu karlaxi í toppinn. Blómgast í júní–júlí.
Blað
Blöðin allbreið, 2,5–4 mm, blágræn, slíður stoðblaðanna löng, 10–20 mm (Hörður Kristinsson 1998).
Blóm
Eitt til þrjú legglöng, nokkuð upprétt kvenöx og eitt karlax í toppinn. Axhlífar ljósar eða dökkbrúnar, yddar í endann, með mjóum hvítleitum himnufaldi. Hulstrin grænbrún eða dökkbrún, 4–5 mm löng, útbelgd, með skakkri trjónu. Þrjú fræni (Hörður Kristinsson 1998).
Greining
Líkist slíðrastör en belgjastörin þekkist einkum á blágræna litnum og á dekkri, útblásnari hulstrum.
Útbreiðsla: Belgjastör (Carex panicea)
Höfundur
Var efnið hjálplegt?
Aftur upp