Fækkunarskeiði rjúpu lokið?
Rjúpnatalningar Náttúrufræðistofnunar Íslands nú í vor benda til þess að fækkunarskeið sem hófst 2005/2006 sé afstaðið. Á austanverðu landinu fjölgaði rjúpum verulega eða 30−70%, en stofninn stóð í stað vestanlands. Venjulega hafa fækkunarskeiðin varað í fimm til átta ár. Þetta eru helstu niðurstöður rjúpnatalninga Náttúrufræðistofnunar Íslands nú í vor, en mat á veiðiþoli rjúpnastofnsins mun liggja fyrir í ágúst í kjölfar mælinga á varpárangri rjúpna, afföllum 2007/2008 og veiði 2007.
Árlegri vortalningu Náttúrufræðistofnunar Íslands á rjúpu er lokið. Talningar gengu ágætlega og voru rjúpur taldar á 40 svæðum í öllum landshlutum. Alls voru taldir um 1600 karrar sem er um 2% af áætluðum heildarfjölda karra í landinu samkvæmt nýlegu stofnstærðarmati. Áætlað er að farið hafi verið um 3% af grónu landi neðan 400 m hæðar. Talningarnar voru unnar í samvinnu við allar náttúrustofur landsins, Skotvís og áhugamenn. Um 50 manns tóku þátt í talningunum að þessu sinni.
Rjúpnatalningar í Hrísey og áNorðausturlandi. | Karri á flugi. Ljósm. Daníel Bergmann. |
Frumniðurstöður benda til þess að fækkunarskeið sé afstaðið en það hófst 2005/2006 og hefur því varað í tvö ár. Þetta kemur nokkuð á óvart og er ekki í samræmi við hegðun stofnsins á undanförnum áratugum. Venjulega hafa fækkunarskeiðin varað í fimm til átta ár.
Íslenski rjúpnastofninn sveiflast mikið af náttúrulegum orsökum. Fyrri hluti 20. aldar einkenndist af mjög háum toppum í rjúpnahámörkum og var sá síðasti í þeirri röð árið 1955. Síðustu áratugi hefur hins vegar gætt langtímaleitni niður á við í stofninum.
Sjá fréttatilkynningu frá Náttúrufræðistofnun Íslands, 11. júní 2008