Útbreiðsla
Maríustakkur er algengur um allt land (Hörður Kristinsson 1998).
Búsvæði
Vex einkum í grasbollum eða blómdældum, oft í giljum meðfram lækjum, skjólgóðum hvömmum, bollum og grónum hlíðum (Hörður Kristinsson 1998 og floraislands.is).
Lýsing
Meðalhá jurt (15–40 sm) með smáum gulgrænum blómum, stórum handstrengjóttum blöðum með reglulega tenntum sepum.
Blað
Stofnblöðin stilklöng (4–20 (30) sm). Blaðkan 4–10 sm í þvermál, nýrlaga, handstrengjótt og sepótt. Separnir reglulega tenntir (Lid og Lid 2005).
Blóm
Blómin eru í þéttgreindum blómskipunum í blaðöxlum, græn eða gulgræn, 3–4 mm í þvermál, fjórdeild. Krónublöð vantar. Bikarblöð græn, standa í kross, odddregin með hárbrúsk í endann. Helmingi styttri og mjóir utanbikarflipar eru á milli bikarblaðanna. Fræflar fjórir, ein fræva með einum hliðstæðum stíl (Lid og Lid 2005).
Aldin
Aldinið er hneta (Lid og Lid 2005).
Greining
Maríustakkur þekkist frá öðrum maríustökkum á útstæðum, allþéttum hárum á blaðstilkunum.
Höfundur
Var efnið hjálplegt?
Aftur upp