Útbreiðsla
Hún er algeng um sunnanvert landið en sjaldgæf norðanlands. Lambaklukkan finnst nær eingöngu á láglendi, hæstu fundarstaðir eru Skúmstungur og Fitjaskógur í um 300 m hæð (Hörður Kristinsson - floraislands.is).
Búsvæði
Vex í flögum eða matjurtagörðum og annars staðar í rótuðu landi. Hún getur orðið fremur hvimleitt illgresi í görðum.
Lýsing
Einær, lágvaxin jurt (5–20 sm) með blöðin í stofnhvirfingu, blómstrar hvítum, smáum blómum og myndar mjóa skálp.
Blað
Blöðin eru fjaðurskipt, endasmáblaðið á stofnblöðunum stærst, kringlótt eða nýrlaga, 5–8 mm í þvermál; hliðarsmáblöðin minni, tígullaga eða kringlótt (Hörður Kristinsson 1998).
Blóm
Blómin í klasa á stöngulendunum, fjórdeild. Krónublöðin hvít, 2–3 mm á lengd, spaðalaga. Bikarblöðin 1–1,5 mm, bleikleit. Fræflar sex, ein fræva (Hörður Kristinsson 1998).
Aldin
Hvert aldin myndast af einni frævu sem myndar 2 sm löngan og 1 mm breiðan skálp (Hörður Kristinsson 1998).
Greining
Blaðhvirfingin getur líkst hrafnaklukku, þær eru auðþekktar í blóma.
Höfundur
Var efnið hjálplegt?
Aftur upp