Seljalandsfoss og Gljúfrabúi

Mörk

Mörk miðast við báða fossa, svo og hamrana og brekkuna á milli þeirra. Auk þess er 200 m jaðarsvæði ofan og neðan við hamrabrún.

Stærð

0,39 km²

Lýsing

Fallegir fossar sem falla fram af fornum sjávarhömrum, Hamragarðahrauni, en undir því er kubbaberg og móberg. Fossarnir eru vatnslitlir en nokkuð háir, Seljalandsfoss er um 60 m hár og Gljúfrabúi um 40 m. Um 700 m eru á milli fossanna og eru þar grasigrónar brekkur og hamrastál efst, móberg að neðanverðu en hraun í efstu brún. Göngustígur er á milli fossanna. Hægt er að ganga á bakvið Seljalandsfoss. Gljúfrabúi leynist inni í móbergsgljúfri en hægt er að ganga inn gljúfrið að fossinum.

Seljalandsfoss er áberandi frá hringveginum þegar ekið er í austurátt og er svæðið meðal vinsælustu áningarstaða ferðamanna hér á landi. Aðstaða ferðamanna hefur verið bætt síðustu ár og er nú gjaldskylda á bílastæði við Seljalandsfoss og tjaldsvæði við Gljúfrabúa.

Flokkun

Grunnflokkur: Virk ferli landmótunar

Flokkur: Vatnafar og jöklar

Gerð: Foss, rofsfossar.

Forsendur fyrir vali

Formfagrir, allháir fossar í vel grónu umhverfi sem tugþúsundir ferðamanna sækja heim ár hvert.

Ógnir

Álag vegna ferðamanna og möguleg uppbygging á aðstöðu fyrir ferðamenn, þjónustumiðstöð of nálægt fossunum gæti haft áhrif á ásýnd þeirra.

Aðgerðir til verndar

Frekari innviðauppbygging og stýring umferðar.

Núverandi vernd

Kortasjá

Seljalandsfoss og Gljúfrabúi í kortasjá

Útgáfudagsetning

3. desember 2020.