Útbreiðsla
Hún er algeng um allt land í deigum jarðvegi og mýrum frá láglendi upp í 700 m hæð. Hún er einnig algeng um hálendið og allhátt til fjalla, hæst fundin á Skessuhrygg í Höfðahverfi í 1150 m og Seljadalsbrúnum við Hörgárdalsheiði í 1100 m en blómstrar þar oft lítið (Hörður Kristinsson - floraislands.is).
Almennt
Hrafnaklukka getur valdið fósturmissi, sérstaklega á fyrstu mánuðum meðgöngu (Arnbjörg Linda Jóhannsdóttir 1998)! Te af fjólubláum plöntum var talið gott ættu menn við svefnleysi að stríða en te af hvítum plöntum átti að halda manni vakandi (Ágúst H. Bjarnason 1994).
Nytjar
Hrafnaklukka drepur iðraorma, örvar starfsemi lifrar og tíðir kvenna svo eitthvað sé nefnt (Arnbjörg Linda Jóhannsdóttir 1998).
Líffræði
Hrafnaklukka inniheldur m.a. bitur efni (Arnbjörg Linda Jóhannsdóttir 1998).
Búsvæði
Kýs helst hálfdeigjur, deigt vallendi og mýrar.
Lýsing
Meðalhá jurt (15–35 sm) með fjöðruðum blöðum og hvítum til fölfjólubláum blómum. Blómgast í maí–júní.
Blað
Stöngullinn hárlaus. Blöðin fjöðruð. Stofnstæðu blöðin með kringluleitum smáblöðum, endablaðið oftast stærst. Stöngulblöðin með mjóum lensulaga eða tungulaga smáblöðum (Hörður Kristinsson 1998).
Blóm
Blómin eru í stuttum og þéttum klasa efst á stönglinum. Krónublöðin hvít, bleik eða fölfjólublá, með dekkri æðum, 10–15 mm löng, naglmjó, ávöl í endann eða örlítið skert. Bikarblöðin græn, 3–4 mm á lengd. Sex fræflar, ein fræva (Hörður Kristinsson 1998).
Aldin
Aldinið er skálpur, myndaður af einni frævu. Hann er 2–3,5 sm langur en 1–1,5 mm breiður (Hörður Kristinsson 1998).
Greining
Blaðhvirfingin getur líkst lambaklukku en þær eru auðþekktar í blóma.
Höfundur
Was the content helpful
Back to top